أفكار لزيادة الدخل

خمس أفكار تزود بيها دخلك

بتفكر دايماً في افكار تزود بيها دخلك ازاي, او تشتغل في وقت فراغك تقدر تدخل بيها فلوس بجانب مرتبك كل شهر.

هنا هنقولك خمس أفكار لزيادة الدخل حتى لو كنت مصور او مبرمج او مصمم :.

١بيع الصور والفيديوهات.

اكيد كل واحد مننا بيجي عليه وقت انه يشتري صوره جودتها عاليه او فيديو.

مفكرتش انك انت الي تصور الصوره او الفيديو دا وتعرضها للبيع ؟.

لو شايف نفسك بتصور كويس اياً كان هي صور او فيديوهات بتقدر تعرضهم علي مواقع كتير تقدر تدخلك دخل كويس جداً مع كل واحد بينزل او بيشتري الصور او الفيديوهات.

دي حتى لو اتباعت لعدد ناس قليل انت مش خسران حاجه انك تعبت مره واحده فقط او فرغت نفسك يوم واحد للتصوير.

وبعد كدا بتدخلك ربح ايا كان بشكل يومي او شهري.

وفيه مواقع stocks كتير جداً تقدر تعرض عليها صورك وفيديوهاتك للتحميل .

٢اعمل متجر الكتروني.

انتشرت جدا الفتره الاخيره ، هتقولي انا مش بعمل برودكت والا بيبيع موبايلات عشان اعمل متجر الكتروني.

هقولك انت لو مصمم جرافيك اي حاجه بتشتغل فيها تعتبر برودكت متاح للبيع و ومفيش اكتر من الناس.

الي بتحتاج تشتري ( تصاميم فيكتور. – ايقونات – خطوط –  تصاميم تيشيرتات ) ، الموضوع متاح بطريقتين انك تقد تعمل موقع وتعرض عليه كل الكلام دا.

او لو امكانياتك متسمحش فيه مواقع كتير بتسمع انك تعرض تصاميمك عليها وبيكون ليها نسبه بسيطة.

مثال : موقع Etsy جميل جدا ، بيعرض كل الحاجات المصنوعة يدوياً زي التيشيرتات او الملابس بانوعها والماجات وغيرها.

انت مش مطلوب منك حاجه غير انك تعمل التصميم وهما عليهم مهمه الطباعه والشحن وغيره مقابل نسبه من المبيعات.

٣– الديجيتال ديزاين.

لو انت بتعرف تصمم تمبلت للمواقع ( قوالب ) او تصاميم ديجيتال  الموضوع دا هيكون ناجح جدا بالنسبالك.

مواقع زي Envato market او Designmodo market وغيرهم ممتازين انك تعرض عليهم تصميم التمبلت بتاعك.

المواقع بيكون متاح عليها انك ممكن تبيع بس التمبلت  PSD او HTML لو عندك خبره فيه.

وغير كدا المواقع دي وغيرهم تقدر تعرض عليهم تصاميم سوشيال ميديا زي الانستجرام ستوري او تعمل فيس بوك تمبلت وغيرهم.

بس نصيحة قبل ماتاخد القرار وتبدا حاول تتفرج كتير علي الحاجات المعروضه علي الموقع واكتر الحاجات المتباعه عليه عشان تعرف الطريقة الاحسن الي تشتغل بيها ايه او المطلوب اكتر ايه.

٤– دروس اون لاين.

بعد فتره كورونا الناس ابتدت تروح اكتر للتعليم اونلاين.

لو شايف مهاراتك كويسه تسمح انك تعلم وتضيف معلومات للي حواليك بمقابل مادي بسيط ، على سبيل المثال لو انت كويس جدا في الفوتوشوب.

ممكن تعمل كورس عن طريقة عمل تصميم انت عامله قبل كدا وانتشر. او حاجه محدش اتكلم عنها قبل كدا في اي درس.

الموضوع ممكن يتنفذ انك تعمل بيدج وتعرض عليها حاجتك او الافضل انه يكون موقع وتقدم عليه الخدمه دي بمقابل مادي بسيط بحيث انك تقدر تبيعه لاكبر عدد ممكن من الافراد.

٥– اكتب كتاب.

فيه مصممين كتير جدا بيعرفو يكتبو كويس وبيعرفو يوصلو المعلومه بشكل كويس وسهل، لو انت تقدر تعمل دا  هيبقا سهل بالنسبالك تكتب كتاب. اياً كان محتوى الكتاب انك تشارك خبراتك الي تقدر تفيد بيها المبتدئين من المصممين غيرك.

ممكن تعرض الكتاب بمقابل مادي بسيط علي صفحتك او علي موقعك.

مش لازم الكتاب يكون مطبوع سهل يكون PDF او الكتروني عموماً.

حاول يكون محتواه واسمه مختلف يجذب الناس فعلا انها تنزله او تشتريه وتقراه ويكون هيضيف ليهم جديد غير اي محتوى متكرر علي الانترنت.

ودول كانو خمس أفكار لزيادة الدخل وهنحاول دايماً نقولك كل الافكار الجديدة والمختلفة الي تقدر تساعدك في زيادة الدخل

لو عايز تقرا عن وظيفة الجرافيك ديزاينر ادخل هنا 

احنا مجموعة شباب حبينا نشارك خبرتنا المتواضعة الي اخدنها من شغلنا المتواصل لسنين كتير في الديزاين والسوشيال ميديا.
احنا لسه بنبدأ وارد جداً تلاقي اخطاء كتير بنحاول قدر الامكان اننا منوقعش فيها ودايماً فاتحين المجال لاي تعديل واي افكار من متابعينا للمشاركه بيها في اي وقت.