ازاي تكون Team leader

ازاي تكون Team leader؟. سؤال في حد ذاته غلط، لان مفيش طريقه سحريه تتعمل تقدر تكون بيها team leader.

انك تكون graphic design team leader هي مش مهنه تعتمد على ترتيب وظيفي عشان قعدت كام سنه في المجال تقرر بعدها انك بقيت تيم ليدر.

والا بتعتمد على مهاراتك من ناحيه الـ Techincal skills.

انك اتعلمت كام برنامج زياده او بقيت شاطر جداً في برنامج معين فنقدر نقول انك بقيت Team leader .

تصحيح مفهوم التيم ليدر :

ناس كتير بتتعامل مع مفهوم التيم ليدر انه شخص مهمته التحكم في التيم المسئول عنه.

بمعنى مثلاً انك تخنق عليهم من ناحيه تعديل الشغل على الفاضي والمليان بمجرد انك مش عايزهم قاعدين فاضيين.

طيب مانت ممكن بدل ماتخنق عليهم، سهل انك في الوقت الفاضي دا تنمي من مهارتهم ؟.

فيه واحد ابن حلال اسمه Anthony Armendariz وهو رئيس قسم التصميم في شركه Funsize قال مقوله توضح المفهوم الي بتكلم عليه اكتر وهي :

أهم حاجه في وظيفتي هي خدمة المصممين وتنميتهم.

يعني انت مهامك كا team leader انك تنمي التيم بتاعك وتعلمه وتديله من خبراتك اكتر من انك تتحكم فيهم على الفاضي والمليان.

خلينا نقسم الموضوع لجزئين :

١- شخص عنده مواصفات الـ Leader بالفطره :

بتلاحظ من صغرك من قبل حتى ما تبتدي تشتغل ومن وانت بتدرس انك بتقابل اشخاص في حياتك عندهم حته الـ leadership من صغرهم.

بيقدر ينصحو الي حوليهم وعندهم ميزه القياده انه بيقدر يوجه الاشخاص عن طريق الكاريزما الي بيمتكلها.

دايماً لما بتلاقي Teamleader سنه صغير في الاغلب بيكون من النوعيه دي لان عنده ادراج ونضج من صغره.

الشخص دا بيكون ملفت للانتباه اكتر في الشغل والاولويه بتكون بالنسباله اكتر انه يكون team leader.

بالذات لو قدر انه يدمج موهبته كا leadership مع خبرته من ناحيه الـ Technical.

٢- شخص قدر ينمي مهاراته الشخصيه انه يكون Leader :

ودا شخص في الاغلب معندهوش حته التيم ليدر بالفطره زي ما قولنا بس عنده قابليه انه يطور من نفسه.

مركزش بس انه يطور نفسه technical لكن قدر انه يشوف شخصيته محتاجه ايه عشان يقدر يوصل انه يكون تيم ليدر.

والاهم ان معندهوش مشاكل في الـ attitude بتاعه في التعامل مع الناس.

بمعنى ان مش كل طموحه انه بيطور نفسه عشان يكون تيم ليدر عشان يوصل لمنصب تحكم او زياده مرتب فقط.

خلينا نتكلم اكتر عن مواصفات الـ team leader او ايه الي بيميزه :

١- الثقه والشخصيه :

جزء مهم انك تكون واثق في قدراتك ثقه مش ( غرور ) فيه فرق كبير ما بين الاتنين.

مينفعش تكون بتدير فريق وانت مش واثق في قدراتك او شخصيتك مهزوزه.

لان هيكون عليك مسؤوليه كبيره في التعامل مع التيم الي معاك وممكن ساعات مع عملاء.

وهيكون عليك عامل كبير في حل المشاكل اياً كانت هي مابين التيم بتاعك او مشاكل في الشغل لازم يكون دايماً عندك حل لكل مشكله.

والحل يكون منطقي وبالعقل وتكون عندك ثقه ان الحل دا مش هيولد مشاكل اكبر من المشاكل الي موجوده.

ازاي تكون Team leader

٢- تسمع اكتر ما تتكلم :

مهم جداً انك تسمع للتيم بتاعك اكتر مانت تفضل تديهم نصايح ٢٤ ساعه .

ودا هيكون عامل مهم انك تفهم دماغ كل واحد عندك في التيم وتعرف تتعامل معاه وتعرف نقاط ضعفه وقوته.

وهنا مش هتعرف نقاط ضعفه عشان تستغلها، لا هتعرف نقاط ضعفه عشان تعرف تحلها وتقويها.

موضوع انك تسمع اكتر هيخلي في امان اكتر وهيولد عواطف نحيتك من التيم واحساس بالراحه في التعامل معاك.

٣- التواضع :

من اهم الحاجات الي لازم تفهمها انك جزء من التيم بتاعك.

بمعنى انك مش عشان بقيت تيم ليدر تحط رجل على رجل وتفتكر انك كدا وصلت لاعلى حاجه انت قدرت توصلها.

لو انت فاكر كدا يبقا انت مينفعش تكون تيم ليدر.

حاول دايماً تطور من نفسك اكتر، اتعلم من التيم بتاعك مش معنى انك الليدر بتاعهم فانت عارف كل حاجه.

حسسهم انك اتعلمت حاجات منهم ودا هيديهم ثقه اكبر في نفسهم وهيديهم طاقه اكبر.

اشتغل معاهم في تاسكات صغيره لو فيه ضغط شغل عشان يعرفو انك واقف جمبهم وبتساعدهم في الشغل.

الموضوع دا بيفرق جداً وهيكون مؤثر على وضعك اياً كان في وسط التيم بتاعك او في الشركه.

ازاي تكون Team leader

٤- الاعتراف بالاخطاء :

مش معنى برضو انك بقيت تيم ليدر فانت مش هتغلط .

خلينا نقولها بالبلدي كدا معنى النقطه دي ( انك متلبسش اخطائك في التيم بتاعك ).

مفيش حد مبيغلطش بس مش معنى انك اديت بريف غلط لشخص من التيم بتاعك والشغل للاسف طلع غير المطلوب.

فتيجي ساعتها تلوم الشخص دا ، اعتذرله وصحح غلطتك لكن متجبش اللوم عليه.

حركه زي كدا ممكن تخسرك ثقه التيم كله وهيحسو بالكره من ناحيتك وعدم الامان.

وهيكون التعامل بنظره انت مش هتحبها والا هتخليك مرتاح في شغلك.

٥- التخطيط :

متبصش تحت رجلك وتكون روتيني.

حدد نقط واعمل plan لشغلك وللتيم بتاعك، شوف نقط الضعف والحاجات الي ممكن تاثر علي شغلك بالسلب وحطلها حلول.

فكر انك تحققق انجازات على مدار وقت او فتره قصيره تأثر بيها على الشركه والتيم بتاعك بالموجب.

حاول تقعد مع كل شخص في التيم بتاعك وانصحه من خلال خبراتك واعمله plan انه يطور نفسه في جزء معين في فتره معينه.

بالذات لو شخص لسه صغير او مبتدئ juinor هيكون كويس جداً انك تعمله plan انه خلال فتره معينه يطور من نفسه.

عشان يقدر يوصل انه يكون senior.

ازاي تكون Team leader

٦- الحلول :

لازم دايماً يكون عندك plan B.

لازم يكون عندك حلول دايماً لاي مشكله ممكن تقع فيها، لازم تكون محضر حل لكل مشكله ممكن تواجهك عشان متلفش حولين نفسك ومتعرفش تتصرف.

التيم بتاعك ٥ افراد لو شخص حصله ظرف ومجاش وواحد تاني تعب ومجاش.

هل عارف هتقدر تعوض دا ازاي ؟.

هل هيكون عندك حلول ان الشغل ميتأثرش في غيابهم ؟

دا مثال بسيط ولازم تكون عامل حساب كل حاجه لان دي مهمتك.

الخلاصه :

ان مفيش حاجه اسمها تعمل سيرش على جوجل ازاي تكون Team leader وتنفذ الخطوات.

لازم تفكر ان الموضوع عامل زي رسمه الشجره والبذره بتاعتها هي الـ attitude بتاعك.

هو اساس كل حاجه تقدر تبني عليها مهاراتك الشخصيه، لازم تغير مفهومك من انك داخل حرب في المكان الي انت فيه عشان توصل لمنصب معين.

والتغيير يكون في مفهوم انك داخل حرب مع نفسك عشان تثبت لنفسك انك تستخق دا مش مع الاشخاص الي حوليك.

التطوير من نفسك ثم التطوير من نفسك اهم حاجه، من جميع النواحي التطوير هو الي بيوصلك وبيلفت انتباه الي حوليك من غير ماتاخد مجهود انك توصلهم دا.

دا كان موضوعنا عن ازاي تكون Team leader

لو عايز تقرا عن وظيفه جرافيك ديزاينر / جرافيك موظف ادخل هنا

احنا مجموعة شباب حبينا نشارك خبرتنا المتواضعة الي اخدنها من شغلنا المتواصل لسنين كتير في الديزاين والسوشيال ميديا.
احنا لسه بنبدأ وارد جداً تلاقي اخطاء كتير بنحاول قدر الامكان اننا منوقعش فيها ودايماً فاتحين المجال لاي تعديل واي افكار من متابعينا للمشاركه بيها في اي وقت.