الفرق بين الديجيتال والجرافيك
الفرق بين الديجيتال والجرافيك

الجرافيك ديزاين و الديجيتال ديزاين

عشان نعرف الفرق بين الجرافيك ديزاين و الديجيتال ديزاين خلينا متفقين في البداية ان اساس الشغل والفكرة واحده بس الاختلاف بيكون في التنفيذ والطلبات الي بتطلب منك.

يمكن الموضوع هيكون معقد شويه اني اقدر اوصلهولك بس في النهاية مش هتخرج من الموضوع غير وانت عارف الفرق.

تعالى احكيلك الاول ليه فيه فرق اساسا مابين الاتنين ؟ وايه الي خلانا نعمل مسمى لكل واحد منفصل عن التاني.

طيب خلينا متفقين برضو ان زمان كان الجرافيك ديزاينر بيعمل كل حاجه ومكنش فيه التفريعات الكتير والمسميات الي موجوده دلوقت.

بمعنى ان كان الجرافيك ديزاينر بيعمل شغل مطبوعات زي كروت ومجلات وبرشورات وغيره ولو جه ويب سايت في النص مفيش مشاكل يعمله.

ومع بداية ظهور السوشيال ميديا برضو كان بيتطلب منه نفس الطلبات وكان بينفذها.

طيب ايه الي حصل؟

الي حصل ان مع توسع مجال الديجيتال الكام سنه الاخيره، تطلبات المصممين الي اخدو خبره واشتغلو اكتر في حته الديجيتال بقت مطلوبه بالاسم، وخلي بالك لما بنقول ديجيتال مش قصدنا انها سوشيال ميديا بس، لا المقصود بيها اكتر من حاجه هنقولها بعدين.

طيب لغاية دلوقت اكيد انت معرفتش الفرق مابين الاتنين

خلينا نتعمق في الموضوع اكتر …

الجرافيك ديزاينر جزء من الشركات والناس الي موجوده في المجال بقو يشوفو الاسم دا ان هو راجل مصمم بيعرف يشتغل على مواد ما قبل الطباعة، الي هي ايه ؟

زي المجلات والبرشورات واعلانات الشوارع وممكن اللوجوهات … الخ

وان الادوات الي بيستخدمها بتكون Adobe Indesign و Photoshop و Illustrator.

الديجيتال ديزاينر بيكون تركيزه اكتر على تصاميم السوشيال ميديا زي البوستات او الاعلانات التفاعليه interactive screens و بيكون عنده فكره عن تصميم المواقع .

وبرضو بيكون عنده فكره عن الانيميشن والتحريك عموما ولما نقول انيميشن قصدنا بيه 2d ، الفيديوهات الصغيره او ال gifs.

مفهمتش برضو الفرق بين الجرافيك ديزاين و الديجيتال ديزاين ؟

خليني اسهلها عليك اكتر …

الجرافيك ديزاينر اغلب شغله بيكون تصميم لاي حاجه تتشاف بعيداً عن شاشه اللاب توب او الموبايل ، الديجيتال ديزاينر هو بيصمم حاجه تشوفها علي شاشة اللاب توب او الموبايل.

ايه ميزه شغل كل واحد فيهم ؟

الجرافيك ديزاينر ميزه شغله ان بيبقا شايف وماسك شغله قدامه وحاجه بتكون ملموسه الناس بتستعملها في الحياه الواقعية.

ودي في حد ذاتها بتكون ميزة ومتعه عن ناس معينه.

الديجيتال ديزاينر ميزته انا بشوفها اكبر لان شغله بيكون علي السوشيال ميديا بالتالي بتشوف تفاعل الناس على شغلك وردود افعهالهم ودي حاجه كويسه جدا.

ايه الي بيميز الديجيتال ديزاينر عن الجرافيك ديزاينر ؟

تصحيح الاخطاء :

مشكله الجرافيك ديزاينر في طبيعه شغله ان الغلطه بموته، بمعنى ان لو حصل غلطه ومحدش اخد باله منها واتنفذت واطبعت الرجوع عن الغلطه دي هيكون مستحيل وهيكون مكلف جداً.

بالعكس عند الديجيتال ديزاينر، الغلطه ملحوقه وتقدر تعدل وتغير اونلاين بسهوله ومن غير اي تكاليف.

المرتبات :

المرتبات تروح لكفه مصممين الديجيتال اكتر من الجرافيك، لان الملحوظ ان الفتره الاخيره التوسع في مجال الديجيتال مسيطر واكبر بكتير من المطبوعات.

المستقبل :

المستقبل رايح للديجيتال اكيد اكتر، الشركات والمؤسسات عموما والمعلنين بيتجه لمنصات الديجيتال اكتر من اي حاجه تانيه.

لان بسهوله بيقدر يحدد الجمهور المستهدف ويوصل للنتائج الي هو عايزها اسهل من اي حاجه تانيه.

طيب ثواني يعني الديجيتال ديزاير هو نفسه الـ UX و الـ UI الي بنسمع عنهم؟

لا دا موضوع تاني ممكن تعرفه اكتر من الموضوع دا : معنى UX / UI

دا كان موضوعنا عن الفرق بين الجرافيك ديزاين و الديجيتال ديزاين

متنساش تتابعنا على انستجرام من هنا

احنا مجموعة شباب حبينا نشارك خبرتنا المتواضعة الي اخدنها من شغلنا المتواصل لسنين كتير في الديزاين والسوشيال ميديا.
احنا لسه بنبدأ وارد جداً تلاقي اخطاء كتير بنحاول قدر الامكان اننا منوقعش فيها ودايماً فاتحين المجال لاي تعديل واي افكار من متابعينا للمشاركه بيها في اي وقت.