الفرق بين ATL و BTL و TTL
ناس كتير فاكره ان الفرق بين ATL و BTL و TTL هو ان فيه واحد منهم طباعه والتاني ديجيتال.
الموضوع مش كدا تماماً والمصطلحات دي قايمه على طريقه التسويق بحت، ويمكن الاتنين في طريقه تنفذيهم فيهم حاجات مشتركه من ناحيه الطباعه.
اول مره تم استخدام فيها مصطلح BTL و ATL الي كان سبب ان يحدد كان سنه ١٩٥٤.
بعد ما بدأ كيان Proctor and Gamble يدفع لشركات الاعلانات بشكل منفصل والموردين بسعر مختلف عن الشركات التانيه الي كان ليها مجهود وتأثير اكبر في ترويج الاعلانات بشكل مباشر.
معناه ايه الكلام الكبير دا ؟
معناه ان ساعتها تم فصل مابين الاعلانات الي بتستهدف اي حد مش ناس معينه والاعلانات المستهدفه وبشكل مباشر.
ودا سبب انك هتلاقي كلمه Line مشتركه مابين المصطلحات التلاته وهو معناه الخط ، الي بيفصل مابين كل طريقه Marketing والتانيه .
خلي بالك الي يهمنا كا graphic designers مش الـ Marketing الي يهمنا اننا نكسب من الكلام دا المعلومه الي نعرف بيها شكل الاعلان ايه الي موجود في الـ Marketing .
طيب ندخل في الموضوع
يعني ايه ATL Marketing ؟
هو اختصار جمله Above the Line Marketing ومعناها التسويق فوق الخط.
ومعناه انه بيستهدف اي حد قدامه وعلى مدى واسع، مفيش فئه معينه مستهدفه بعينها.
الاعلانات دي هي الي انت بتشوفها في التلفزيون او بتسمعها في الراديو او وانت ماشي في الشارع شوفت يافطه وممكن كمان في المجله او الجورنال.
لو فكرت شويه في طريقه استهداف الاعلان دا للاشخاص هتلاقي الموضوع الى حداً ما غرضه الانتشار.
ومش دقيق في اختيار الفئه المستهدفه الي هو عايزها.
طيب دا ايه فايدته ؟.
الاستعمال للـ ATL في الاغلب هو الترويج وحملات التوعيه للعلامه التجاريه branding بمعنى ادق هو brand awareness.
يعني ايه BTL Marketing ؟
هو اختصار جمله Below the Line Marketing ومعاناها التسويق تحت الخط.
وهو عكس الـ ATL بيستهدف فئه بعينها ، بتكون حمله محدده متجهه لاستهداف اهتمامات واشخاص معينة.
مثال: اعلانات Facebook او اعلانات Google بتبقى محدد الاهتمامات والفئه العمريه وغيرها من سبل الاستهداف.
مش معناها انها بتتفد على الانترنت بس ، يمكن من كام سنه قبل انتشار اعلانات جوجل وفيس بوك.
كان الناس بتلجئ لاستهداف الناس عن طريق SMS او الترويج على التليفون عن طريق list لارقام تليفونات ناس من الفئة المستهدفه دي بعينها.
وطبعاً دي الطريقه المفضله حالياً لناس كتير لانها ادق واوفر الى حداً ما.
طيب وايه موضوع الـ TTl Marketing دا ؟
هو اختصار Through the Line Marketing ومعناها عبر التسويق المباشر.
شوفت كل الي احنا قولناه دا ؟ هو كل دا بس في حاجه واحده يعني Mix مابين ATL و BTL.
الشركه الي بتعلن بتستخدم كل الطرق في الـ ATL و BTL للترويج او الاعلان عن الخدمه بتاعتها.
ودا في الاغلب الي بيحصل في مصر او الدول العربيه انك تلاقي اعلان منتشر في اكتر من مكان على الانترنت والتلفزيون وغيره.
بس دا طبعا على حسب حجم الـ brand لو كبير مش شركه صغيره.
الـ TTL اكيد تأثيره اكبر لانه بيستهدف كل الناس وبيدي فرص ان الاعلان بتاعك يوصل لنطاق اكبر.
خلاصه الفرق مابين الـ BTL والـ ATL
زي ماقولنا الموضوع متوقف على نوعيه المعلن.
مثال بسيط هيلخصلك الموضوع :
تفتكر لو شركه بتصنع اقلام، هل الافضل انها تتجه للـ ATL والا الـ BTL؟
اكيد الافضل انها تتجه للـ ATL لان الجمهور المستهدف لفئة زي كدا صعب تحدده ، مين الي بيستخدم الاقلام ؟.
دكتور / مهندس / طالب …
سنهم قد ايه ؟ من اول ما طالب يدخل المدرسه لغايه ما يطلع معاش !.
فبالتالي لما الراجل دا يستخدم ATL هتلاقي قدر يغطي الناس دي كلها على قد مايقدر ، والمكان دا انسب له.
بالعكس ان لو شركه منتجات تجميل مثلا، فبالتالي انت جمهورك معروف ومحدد ، هتقدر انك تحدده عن طريق الـ BTL.
ترجمه الكلام كله كفايده ليك كـ graphic designer ايه ؟
الموضوع بالنسبالك كدا وضح اكتر، او بقى متقسم بالنسبالك كمجالات او تخصصات.
اكيد لو حد هيعمل اعلان BTL مش هيجيب designer خبره في تصميمات الـoutdoor عشان يعمله فيديو ينزله على السوشيال ميديا كاعلان مثلاً، والعكس.
الا لو انت designer او art director شاطر وعندك خبره في المجالات دي وعدى عليك معظم الحاجات دي وقدرت تنجح في تنفيذها.
في النهايه بعد ماعرفت معنى كل مصطلح اكيد واخد بالك اننا في عصر الـ BTL واعتقد ان المستقبل هيتطور اكتر في الجزء دا.
واكيد في نفس الوقت مينفعش نتجاهل الـ ATL لانه مازال وجوده مؤثر بشكل كبير.
الصوره دي هتسهل عليك ملخص الي احنا قولناه اكتر.
دا كان موضوعنا عن الفرق بين BTL و ATL و TTL.
