والنهاردة موضوعنا عن خناقه الديزاينر والاكونت مانجر
ادخل اي شركة واسال اي graphic designer ايه رايك في account manager الي هنا ؟
الرد الاغلب هيقولك ٩٩ في الميه منهم !@#!@$#@. ولو عكسنا السؤال والشخصيات هتلاقي نفس الاجابة.
طب ايه حوار خناقه الديزاينر والاكونت مانجر ؟.
تعالو نمخمخ في الموضوع بشكل علمي ومعنوي وبدني وذهني .
الحقيقة المره الي الاتنين رافضنها انهم مينفعش حد يشتغل لوحده من غيره التاني.
وبمعنى اصح وعلمي هي علاقه تكامليه تكافلية لازم يكون الشخصين دول موجودين عشان الشغل يمشي.
طب كلام جميل ؟.
لماذا بقا البركان الي بيثور والحرب الي بتلعلع مابين الاتنين في اي Task واي تعديل والي بتخلي الشخصين يفكرو في كل جزء من الثانية في طريقة مختلفة و Creative في قتل الثاني.
تعالو نمسك اكتر حاجه بتسبب ضغط في الشغل بوجه عام وبعدين نمسك كل واحد لوحده ونشوف ايه الي بيسبب البلاوي الزرقا الي بتخلي المكتب يولع في ثانيه.
اول حاجه يباشا والمتعارف عليها في اي شركه والمسببه للكوارث هي الـ Deadline.
الي بسببها ضغطنا بقا اعلي من طموحنا. وخش بعد كدا علي الكواليتي الي كل واحد بيفضل يعصر نفسه عشان يطلع لبن العصفور.
والتفكير في انك هتقدم ايه للكلاينت عشان يكون منشكح. وطريقة الشغل والبلان والذي منه الي بتستعملها عشان تقلل من اخطائك الي ممكن تسببلك مشاكل مع الـ Client.
دا غير الاسباب الغير معلومة الي بتطلع كل يوم وبيتم اختراعها ولسه مش لاقينلها تفسير.
نستفاد ايه من الكلام دا ؟.
هتستفاد لما نوزع ضغوطات كل واحد ونعرف الاول ايه الي بيسبب المشكله مابين الطرفين !.
تعالى نشوف الـ Account manager والي بيمر بيه. الضغط المهم الي لازم نتكلم عنه وهو كفيل اننا نتعاطف معاه ونطبطب عليه هو التعامل مع الكلاينت.
الشخصية دي فعلا شايله عنك بلاوي من رغي وكلام في التليفون بالساعات ومن الايميلات الي بتتبعت مش فاهمين هو عايز ايه.
والا الفلوس الي متاخره عليه الي بيفضل يزن عليه عشان يدفعها.
غير البريف العجيب الي بيبعته والاكونت مانجر بيحاول انه يفصصهولك.
عشان تقدر تفهم هو عايز ايه ومع كل دا هو مطلوب منه انه يحافظ على الكلاينت دا من غير مايعمل معاه مشاكل او يبقا فيه اي شكل من اشكال التهديد انه الكلاينت يقرر انه يمشي من الشركه لان بكل بساطه دي بتكون مسؤوليته.
وكل دا كوم وانه ينزل يروح ميتنج معاه دا كوم تاني.
في عز الحر او في عز البرد ممكن يروح مشوار لاخر الدنيا عشان ميتنج في الاخر ميكملش ربع ساعه يقول فيهم كلمتين ملهمش لازمه !.
فبالتالي متستغربش لما تلاقي الاكونت مانجر داخل عليك وهو متعصب او شايط.
ممكن جدا يكون لسه خارج من مكالمه مش ظريفة مع Client ودخل عليك دخله مش ظريفه نتيجه الي شافه.
نروح عند الـgraphic designer ونشوف مشاكله الي بتسبب الخناقه الي بتتلم عليها الشركه كلها ايه.
لازم قبل اي حاجه تبقا عامل حسابك ان الـ Graphic designer فيه نقطه اختلاف كبيره مابين ضغط شغلك كا Account manager ومابينه.
الـ Account manager ممكن يكون مسؤول عن كلاينت واحد او اتنين او حتي تلاته.
لكن الديزاينر في الاغلب بيبقا مسؤول عن كل Clients الشركه. يعني بيتعامل مع اكتر من Account manager في نفس الوقت.
يعني شايل نرفزتك وعصبيتك انت وتلاته اربعه زيك تاني، فبراحة عليه.
وبالتالي الراجل دا شايل شغل اكتر من كلاينت ف الضغط عليه ذهنياً برضو كبير، اعمل حسابك ان الراجل دا معرض انه يكون شغال.
وفجأه النور يقطع او Photoshop يضرب ويلاقي شغله كله الي كان شغال عليه خمس سبع ساعات كله راح ، بدون اي انذار مسبق . انت متخيل ؟.
شغله معتمد علي عصر دماغه وارهاقه بيكون ارهاق ذهني اكتر ماهو ارهاق بدني.
او بمعنى اصح الارهاق الذهني بينسيه ارهاقه البدني الي مش بييكتشفه غير لما بيوصل البيت وينام عليي سريره ويلاقي ضهره بيعمل (تش) من كتر قاعده الكرسي.
عنيك دمعت ؟
عارف انك مستني حل المشكله ايه في الاخر، احب افاجئك واقولك ان بحكم خبرة الي بيكتب الكلام دا هي ملهاش حل جذري ولو اتحلت هتتحل فتره وهترجع تاني، هديلك مثال :
عارف الاتنين المرتبطين الي بيفضلو يهلكو ويهرو عشان كل واحد فيهم شايف نفسه هو الي صح. وكل يوم خناق. اهو هما دول الاكونت مانجر والديزاينر، ولو يوم اتفاهمو او اسبوع او شهر هيرجعو يتخانقو برضو :D
بس خلينا نكون ايجابيين ومتفائليين.
الموضوع فيه امل انه يتحل لو كل واحد فيهم اقتنع ان التاني طالع عينه فعلا وبيواجه صعوبات ومشاكل التاني ميعرفش عنها حاجه ، وان مفيش حد فيهم شغلانته سهله والا بيواجه فيها مشاكل.
وخلينا نقول حاجه بجد شويه، ان اي علاقه فيها مشاكل او حساسه بالذات لو الشغل اساسها هي الاحترام ، الاحترام بجد مش انك تتعامل مع الي قدامك باحترام ساخر منه ، وعلي فكره دا هيخليك محترف في تعاملك مع الناس في شغلك.
لازم الـ account manager يحاول انه يقرا ويعرف عن الجرافيك والـ graphic designer بيعمل ايه في شغله.
وكل حاجه بتاخد منه وقت قد ايه عشان فعلا الديزاينر الي قدامك يحس انه فاهمه ومقدر شغله.
مش مجرد بتطلب منه حاجه وخلاص. ودا هيخليك تديله brief مفهوم اكتر.
هيتبسط وهتعرف تتعامل معاه اكتر على فكره.
لما تنتقد شغل الـ graphic designer حاول طريقتك تكون لطيفه. متحسسوش ان شغله وحش.
( تفتكر لو غيرنا اللون هتبقا احسن ) تفرق كتير لو قولتله ( اللون الي انت عامله مزغلل عيني هييخوهيخو ).
وبلاش كلمه ( مش حاسس / حاسه الديزاين ) الكلمه دي كفيله انك تخلي السلك الاحمر يلمس مع الاخضر في دماغك، وميبقاش عارف هو محتاج يحسسك بالديزاين ازاي بالظبط.
بعد مايخلص الديزاين قوله كلمه حلوه ، تسلم ايدك ، تعبتك ، طلعت عينك ، خلي الشخص دا يروح بيتهم وهو حاسس انه عمل حاجه حلوه في يومه.
نفس الكلام للـ graphic designer
حاول تعرف اكتر الراجل دا بيمر ب ايه ، اكيد انت اشتغلت freelance لفتره واتعاملت مع client بصوره مباشره وعارف الضغط الي هو بيمر بيه ، حاول تحتويه وتحسسه انك بتساعده مش عايز تزيحه من فوق دماغك وخلاص ، هيحبك .
طبعاً احنا مش بنتكلم عن الـ graphic designer الي قاعد طول اليوم فاتح ال youtube ومش شايف شغله. 😀
بلاش تحسسه لما يجيلك بتعديلات انه جايبيها من عند خالته، فيه client بيتعامل معاه هو الي بيديله التعديلات وبيحاول ييجبهالك بصوره وطريقه تفهمها.
اقترح عليه افكارك واقتراحتك بطريقة لطيفه ، (لو عملنا الفكره دي هتكون احسن ) تفرق كتير لو قولتله ( انا شايف الفكره دي احسن ومش هعمل فكرتك) بسهوله ممكن تحل الموضوع وتجتهد انك تعمل فكرتك وفكره الـ client عشان تبقا مقتنع انك عملت الي عليك.
ودا كان موضوعنا عن خناقه الديزاينر والاكونت مانجر
في النهاية:
اتمني ان اكون وفقت علاقتين من افشل العلاقات التي نمر بها علي مر تاريخ الشركات والـ Agencies.
وعلى امل ان نتقابل في قعدة عرب اخرى.
ولو انت مصمم جرافيك وعايز تعرف هتعمل ايه بعد مايبقى عندك ٤٠ سنه ادخل هنا.
