سينما فور دي – مايا – ماكس – محتار؟
لازم اي مصمم يجي عليه فتره وهو بيفكر انه يطور من نفسه. فترة اذبهلال وتحس الاسلاك دخلت في بعض ومتعرفش راسك من رجلك والمفروض تبدأ من فين وايه الصح.
ويمكن من اكبر دوامة بندخل فيها هي دوامة الثري دي. تبتدي تشوف شغل قدامك لناس بتطلع حاجات ثري دي وتقول انا عايز اعمل دا.
وتبتدي تتخيل وتسأل نفسك أسئلة :.
تخيل لو التصميم الفلاني الي عملته الشهر الي فات الكلمه الي فيه بدل ماهي تو دي كانت تبقا ثري دي ؟.
تخيل لو الفيديو الي عملته من يومين بدل ما البطه الي بتتمشى فيه ماشيه بالجنب بس تبقا ماشيه علي الحيطة ؟.
ومن هنا مفعول شغف التعلم يبتدي يشتغل في اعضائك وتلاقي نفسك سايب كل الي في ايدك وتجري تروح فاتح اللاب توب.
وتفتح جميع المواقع الي في العالم عشان تتعلم وتلاقي نفسك دخلت في ثقب احادي عشر الابعاد ومش عارف تخرج منه.
تلاقي الي بيتكلم عن السينما فور دي والي بيتكلم علي المايا.
وفجاه تلاقي نفسك فتحت فيديو للماكس وتلاقي اعلان تطلعلك للبليندر. وتبتدي عينك هنا تقلب دواير وتكتشف انك ضيعت ٥ ساعات ف دايره عمال تلف فيها حوالين نفسك.
وفي الاخر هتعمل حادي بادي وهتنزل الماكس.
وتبتدي تفتح درس ازاي تعمل كنبه بتلات رجول وهتطبق الدرس في اربع ايام. بعدها هتيجي تسال نفسك هو انا بعمل كنبه ليه وانا ديجيتال جرافيك ديزاينر وكمان مانا ممكن ادخل اجيب الكنبه دي من موقع ستوك جاهز؟.
طب تعالى نمسك الموضوع حته حته ونشوف خلاصة الموضوع ايه.
خلينا نسأل ايه الي وصلك للمرحلة دي، الي احنا اتكلمنا فيه دا تسمى بمرحلة شغف التعلم.
انك شوفت حاجه جامدة جدا وابتديت تتخيل ان الحاجه دي لو اتطبقت علي شغل بتاعك هتكون ازاي.
وعلى فكره لغايه هنا دي حاجه كويسة جدا وصح وهتساعدك انك تطور من نفسك بس الغلط انك تتحرك بدون ماتفكر ايه هي الخطوات الصح الي المفروض تاخدها بالترتيب او ايه اكتر حاجه هتكون مناسبه لشغلك اكتر.
قبل ماقولك على الحلول خليني اقولك باختصار كل برنامج متخصص اكتر في ايه عشان تعرف الفرق مابين كل برنامج.
3D max :
هو برنامج متخصص اكتر في المودلينج وهتلاقي معظم الي بيستدخمه الناس المعماريين او مهندسين الديكور.
Maya :
ممتاز في المودلينج وكمان في الانيميشن. ومعظم استخداماته في افلام الثري دي وافلام الكارتون.
Cinema 4d :
كويس جداً في المودلينج والانيميشن وممتاز لو هتعمل بروجكت مشترك مع الافتر افيكت.
استخدماته مختلفه ومش متخصص فيه حاجه بعينها ولكنه اقل تعقيداً ولو انت ديجيتال ديزاينر هيكون مناسب ليك.
Blender :
بالمقارنه بالتلات برامج الي فوق هو يعتبر اقلهم الى حداً ما وبيقوم بنفس اعمال السينما فور دي.
الميزة المختلفه انه مجاني يعني مش هتحتاجله كراك او سريال نمبر ولو انت ديجيتال ديزاينر هيكون مناسب ليك برضو.
طبعا بعد ماقريت الي كتبته اتلخبطت اكتر ، بس احب اقولك الي قريته فوق دا عن كل برنامج هيفيدك ١٠٪ بس، ليه؟.
١– لان من الاخر انت لو بقيت برنس في اي برنامج من البرامج دي انت هتعرف تطلع الي بيطلعه اي برنامج منهم بمعنى ايه.
بمعنى انك لو بقيت كويس جدا ومتمكن من السينما فور دي انت ممكن تطلع بروجكت شبيه للاخراج الي بيطلعه المايا وممكن كمان متحسش باختلاف.
طيب دا معناه اني ادوس في اي حاجه وخلاص؟.
٢– اكيد لا، اسال نفسك الاول انت هتتعلمه عشان هتستخدمه في ايه ؟
٣- هل انت هتحتاج انك تتعلم حاجه بحجم المايا عشان مجرد تطلع في الاخر لوجو ثري دي ممكن السينما فور دي او البليندر يعمله؟.
٤- هل انت بتستعمل بس الفوتوشوب والاليسترتور في شغلك وهتعمل شيفت كارير يستحق انك تتعلم حاجه بحجم المايا؟.
٥– من الاخر قيس شغلك وحدد اتجاهاتك عشان متضيعش وقت في حاجه انت ممكن متستفدش بيها.
مش بس مش هتستفاد بيها انت كمان ممكن يجيلك احباط انك موصلتش للي انت متخيله وهتصرف نظر بسبب خطوة بس غلط.
٦- حاول تقرا الاول اكتر عن كل برنامج وتشوف كل برنامج بيعمل ايه، متنزلش البرنامج وتشتغل عليه غير لما تكون اتفرجت علي فيديوهات للبرنامج الي اختارته كتير.
دا كان الموضوع باختصار عن سينما فور دي – مايا – ماكس – محتار؟.
هنحاول نتكلم عن الموضوع بطريقة تفصيليه اكتر قريب جداً
لو عايز مصمم جرافيك وعايز تعرف مصيرك ايه بعد ما يبقى عندك ٤٠ سنه ادخل هنا
