معنى و طريقه تصميم الانفوجرافيك

يعني ايه انفوجرافيك؟

طريقه تصميم الانفوجرافيك

الانفوجرافيك هو باختصار طريقة عرض مجموعه بيانات اياً كانت هي عباره عن ايه، ممكن تكون شويه كلام علي ارقام…

طيب مانا ممكن اعمل دا زيه زي اي تصميم بعمله ؟!.

هي دي الفكره هنا ان المختلف في الانفوجرافيك انك تعرف تعرض البيانات دي بطريقه ان اي حد هيشوفها هيوصله المعلومات الي فيه بسهوله من غير تعقيد.

نوضح اكتر

شركه من ضمن الشركات او مؤسسه عندها تقرير بارقام وبيانات كتير جداً محتاجه انها تعرضها للناس.

خلينا نقول علي سبيل المثال عايزه تعرض الانجازات بتاعتها.

تفتكر هتعرض ٥ والا ٦ صفحات للناس ؟ حد هيبقا عنده وقت او صبر يقرا دا كله ؟ اكيد لا.

ودي بتكون مهمة الانفوجرافيك

انها تختصر المعلومات الكبيره دي في تصميم بسيط مجمع البيانات المهمة بس بطريقة سهله وجذابه تشجع الناس انها تقراها من غير ما تزهق.

طريقة تصميم الانفوجرافيك

ناس كتير بتتفق ان اصعب وارخم نوع من انواع التصميم هي الانفوجرافيك بسبب كمية البيانات والكلام الي بتكون موجوده فيه.

مفيش حد مننا اكيد بيحب انه يستخدم كلام كتير في التصميم وهي دي صعوبة الموضوع انك ازاي تصمم الانفوجرافيك بكمية الكلام الكتير دي.

بطريقة لطيفه تخليك تقدر تخليك توصل البيانات والرساله الي انت عايز توصلها بسهوله.

طيب ايه الحاجات الي لازم تخلي بالك منها وانت بتصمم الانفوجرافيك؟

خلينا نمسك نقطه نقطه المفروض تاخد بالك منها وانت بتصمم الانفوجرافيك اولها. :

الجمهور المستهدف :

طريقه تصميم الانفوجرافيك
Who does live in the underground? by Polina Ugarova

خلينا نعتبره في البدايه انه زي اي تصميم بتعمله موجهه لفئه معينه من الناس.

يعني مثلاً لو الانفوجرافيك دا موجه للاطفال ، اكيد هتعمل حسابك في الالوان او icons المستخدمه انها تكون جدابه.

او بتعمل انفوجرافيك موجه لمجال الطب ، الهندسه …

العنوان :

طريقه تصميم الانفوجرافيك
Infographic / The Daily Grind by Holly Herman

الانفوجرافيك بيكون ترتيب محتواه ثابت الى حد كبير، والاعتماد بنسبه كبيره بيكون على الكلام اكتر.

بمعنى ان بيكون فيه عنوان واضح في التصميم الي بيعبر عن محتواه، وهو الي بتبدء بيه دايماً الانفوجرافيك، عشان الي يشوفه يعرف محتواه بيتكلم عن ايه.

مثال لو الانفوجرافيك بتاعك بيتكلم عن العمل من المنزل، لو العنوان يكون :

كيف تستمر بالعمل من المنزل ؟

مع مراعاه ان حجم وخط العنوان يكون ملفت هيوصل للناس ان الانفوجرافيك بيتكلم عن ايه بسهوله اكتر.

طريقه تصميم الانفوجرافيك

البساطه:

زي ما قولنا ان المختلف في الانفوجرافيك انك عايز توصل رساله ومعلومات بطريقة سهله.

البساطه تعتبر اهم حاجه في الانفوجرافيك ومن غيرها هيكون سبب فشل الانفوجرافيك ورفضه بسبب عدم توصيل الغرض منه.

وعشان تجبر الناس انها تقرا المعلومات دا لازم تعمل حسابك ان ميبقاش فيه دوشه كتير في التصميم.

بمعنى انك لو عايز تعبر عن جمله معينه هتعبر عنها بـ icon بسيطه ليها علاقه بالموضوع.

حاول دايماً تسيب مساحات في التصميم عشان يكون الكلام ( مرتاح ) ، عشان متعملش تشتيت للناس الي هتشوف التصميم.

طريقه تصميم الانفوجرافيك

انواع الانفوجرافيك :

الانفوجرافيك متقسمه لانواع كتير، وكل نوع له غرض استخدام ، خلينا نتكلم عن الانواع المعروفه وشائعه الاستخدام اكتر.

Visual Infographics:

ودي من الانواع المحببه للمصممين لان بيكون عندك مساحه كويسه انه تستخدم صور او تعبر عن البيانات بتصميم.

ودا بيكون بسبب ان مفيش كلام او بيانات بحجم كبير ودا بيديلك حريه اكبر في مساحه التصميم.

طريقه تصميم الانفوجرافيك
Visual Infographic Example (Florida Wildlife Infographics by Yuliya Shumilina)

Timeline Infographics:

من الانفوجرافيك الشائع استخدامه، ودا بيكون غرضه عرض ترتيب زمني لاحداث او بيانات او انجازات.

وبتكون علي اطار سنين او شهور او فتره معينه.

Image result for timeline infographic

List Infographics:

في الاغلب بيكون استخدامه لعرض بيانات او وصف لمنتج معين، علي سبيل مميزات المنتج ومكوناته.

List-Based Infographics Example (Amazon product listing by Lutfun Haque)

Comparison Infographics:

وبيكون استخدامه في المقارنه مابين عنصرين اياً كان هما ايه ( منتج او شركه …

بيكون التصميم متقسم علي اكتر من جزء علي حسب عدد العناصر الموجوده فيه.

what is an infographic
Comparison Infographics Example (Illustrator Vs Photoshop by M.A.Kather)

Statistic Infographics:

اصعب انفوجرافيك من ناحيه التصميم بسبب انه بيحتوي علي بيانات كتير وبيكون شبه الرسم البياني شويه.

وبيكون التحدي بالنسبالك فيه انك تقدر تعرض البيانات بشكل يقدر للجمهور انه يقراه بسهوله مع وجود كميه البيانات الكبيره الموجوده فيه.

Statistic Infographics Example (Plastic Waste Pollution by Jamie Kettle)

Process Infographics:

بيكون محدد لطريقه عمل او خطوات حاجه معينه ، زي طريقه عمل شئ معين وخطواته ايا كان هو ايه.

Process Infographics (How-To: Holiday Cocktails)

العناصر الي بتستخدمها في الانفوجرافيك :

زي ماشوفنا ان فيه انواع كتيره للانفوجرافيك لكن في عناصر مشتركه مابينهم كلهم من ناحيه التصميم.

وهي بتكون المفتاح بتاعك عشان تقدر توصل المعلومات الي انت محتاج توصلها بسهوله.

١- الالوان :

نفس الحال اكنك بتصمم اي شئ بتحتاج تناسق الوان يكون في التصميم الي انت بتعمله.

لكن الموضوع هنا بيكون له اهتمام زياده شويه، لان الموضوع مش هيكون مجرد توصيل صوره او تصميم.

لكن هيحتاج انه يقرا البيانات الموجوده في التصميم وعشان كدا لازم تعمل حساب ان الي يقرا الكلام لازم تكون (عينه مرتاحه ) ومتشجع انه يكمل قرايه.

Balanced Colors in Infographics (IoT Device & Cloud Computing by Anjum Alam)

٢- الخطوط :

لازم تراعي انك تستخدم خطوط واضحه للقرايه.

بلاش اختيارك للخطوط تكون معقده والي يشوفها ياخد وقت في القرايه، مع انك تراعي التسلسل الهرمي في التصميم بالنسبه للخطوط والكلام.

يعني بالتاكيد عنوان الانفوجرافيك مش هيكون زي العنوان الفرعي من ناحيه حجم الخط.

وكذلك بالنسبه للبيانات الموجوده في التصميم.

بلاش تستخدم اكتر من نوعين في الخط :

هيسبب ازعاج للشخص الي بيقرا وهيأدي انك تدمر الرساله الي انت محتاج توصلها.

Do’s and Don’ts in Design – Infographics by Digital Herd Agency

icons الايقونات :

بسبب ضيق المساحه في الاغلب بسبب المعلومات الكبيره فبيكون اسلم حل انك تستخدم icons تعبر بيها عن المحتوى.

ممكن icon واحده تقدر تشرح جمله بالكامل لو عرفت تختارها صح.

يعني مثلا لو فيه كلمه facebook تقدر تستبدلها بـ icon الفيس بوك وهكذا ودا بيوفر معاك مساحات كويسه في التصميم.

ومع ذلك حط في اعتبارك ان لازم يكون اختيارك للايقونات انها تكون نفس الـ style عشان تقدر توصل لشكل كويس في النهايه ومريح.

طريقه تصميم الانفوجرافيك

Infographic by Aimi Humayra Ahmad Suhaimegg

الخلاصه :

تصميم انفوجرافيك مش صعب بس محتاج انك تتفرج علي امثله كتير عشان تقدر تجمع صوره كامله للتنفيذ.

وحط في بالك ان الموضوع مطلوب جداً حالياً لو كنت digital graphic designer هيقابلك كتير الطلب دا.

ممكن يكون تصميم انفوجرافيك بالنسبالك ممل الى حد كبير بس هتكون مميز لو قدرت تكون متمكن من تصميمه بسهوله.

ودا كان موضوعنا عن طريقه تصميم الانفوجرافيك

لو عايز تحمل powerpoint templates مجانيه ادخل هنا

احنا مجموعة شباب حبينا نشارك خبرتنا المتواضعة الي اخدنها من شغلنا المتواصل لسنين كتير في الديزاين والسوشيال ميديا.
احنا لسه بنبدأ وارد جداً تلاقي اخطاء كتير بنحاول قدر الامكان اننا منوقعش فيها ودايماً فاتحين المجال لاي تعديل واي افكار من متابعينا للمشاركه بيها في اي وقت.