مرتب مصمم المواقع في مصر ، بيختلف مابين الشركه والتانيه ، واكيد بيختلف من حيث خبرتك .
مبدئياً قبل ماتعرف مرتب مصمم المواقع كام لازم تتاكد من مستوى مهاراتك وتعرف انت في اي مستوى على اساسه تقدر تحدد مرتبك.
هنتكلم عن الراتب المتوسط والاغلب مابين كل الشركات في مصر، وهنتكلم عن الحد الادنى والمتوسط والاعلى.
الحد الادنى:
الحد الادنى لـ مرتب مصمم المواقع في مصر بيكون ٤٠٠٠ جنيه راتب شهري.
ودا بيكون للمبتدئين اكتر ، يعني الناس الـ juniors.
وطبعا المهارات الي لازم تكون عنده عشان يقدر يقبض المرتب دا في الشهر هو انه يكون قادر علي تصميم (فقط) موقع علي اي برنامج خاص بتصميم المواقع، زي فوتوشوب او غيره.
متوسط المرتبات :
متوسط مرتب مصمم المواقع بيكون ما بين ٨٥٠٠ جنيه الى ١٥ الف جنيه ، ودا لازم تكون مهاراتك اعلى شويه وفهم اكتر في تفاصيل تصميم المواقع.
وعندك خلفيه عن مطورين المواقع بيعملو ايه بعد ما بيستلمو منك ملف التصميم.
وعندك خلفيه عن تطوير المواقع بشكل عام ، بمعنى عندك فكره عن الـ developments و الـ coding.
الحد الاقصى :
مرتبات مصممين الجرافيك في مصر بتوصل لرقم ٢٠ الف جنيه في الشهر ، وفي الحاله دي بيكون المصمم خبره لا تقل عن ١٠ سنين ومتمكن جدا من كل تفاصيل تصميم المواقع.
وفي الاغلب بيكون من مهامه قياده فريق مصممين اصغر منه.
ويكون عارف ازاي يتعامل مع المديرين ويكون خبره في عمل presntation يقدر يعرض بيها شغله وشغل الفريق.
نظرة عامه :
اختلاف المرتبات بيكون معتمد بشكل كبير علي حجم الشركه الي طالبه الوظيفه دي .
يعني لو شركه صغيره ومحتاجه مصمم مواقع خبره ١٠ سنين مش هتدفع له ٢٠ الف في الشهر زي ماممكن يكون نفس الوظيفه في شركه مالتي ناشونال وتدفع الرقم دا.
ملحوظه :
الكلام الي فات كله متعلق بمصمم المواقع مش مرتب UX/UI لان فيه اختلاف شويه في حاجات كتير.
