معنى Brief البريف، لما يجي حد يقولك انا عايزك تعملي اعلان كريتيف للشركه بتاعتي ويسكت متوافقش.
لانك في الاغلب هتعمل ديزاين حلو بس بكونسبت غلط وهيترفض.
تعالى ندي مثال بسيط على معنى Brief البريف البريف تخيل يقولك متعرفش المحل الفلاني فين وتقوله اول يمين.
ولما الراجل دا يدخل يمين ويلاقي شارع كبير مش عارف يروح ولا يجي منين.
هيتوه بسببك لانك مدتهوش وصف كامل لمكان المحل او لما يدخل الشارع دا يتصرف ازاي.
لما نيجي نطبق دا علي حياتك اليوميه كجرافيك ديزاينر بيتطلب منك شغل.
هتلاقي نفسك لما تيجي تشتغل من غير بريف الي هو يعتبر فيه كل تفاصيل الديزاين الي هو محتاجه منك هتلاقي نفسك عارف بس العنوان بس من بره بس لما تيجي تشتغل وتدخل في تفاصيل الديزاين هتلاقي نفسك توهت ومش عارف ايه العناصر الي انت المفروض تستخدمها او الالوان او الخطوط وغيره.
طيب ايه هو مكونات البريف دا او ازاي اطلبه وابقي متاكد انه كامل من مجاميعه.
البريف هو المفروض يغطي جميع أسئلتك وانت بتعمل الديزاين من بدايه الفكره للاخر .
يعني خلينا نقول لما يطلب منك حد تصميم للشركه دي ، المفروض هتحتاج ايه.
هحتاج اعرف الشركه دي شغاله في ايه ، علي سبيل المثال الشركه دي بتشتغل في العقارات طيب هل هي بتبيع فلل ولا بتسوق لشقق ولا شاليهات ؟ طيب هي بتبيع فين ؟ هل في مناطق ساحليه ولا داخل القاهره علي سبيل المثال ؟.
هل هي ليها جايدلاينز شامله الالوان والخطوط وغيره وليهم صور تقدر تستخدمها ولا هتستخدم ستوكس؟.
الشركه دي بتارجت مين ؟ بتارجت ايه ؟.
A والا B والا C
طيب هتقولي هي الحاجات دي هتفيدني في ايه هو انا هشتغل معاهم.
هقولك اه اكيد لما تيجي تعمل لكلاينت شغل لازم تعتبر نفسك بتشتغل معاهم وانك بتعمل حاجه لنفسك عشان تعرف تطلع ديزاين يحقق الغرض الي هما عايزين يعملوه ايا كان هو ايه.
ولو هو بيتارجت سي وروحت استخدمت صور ناس لابسه بدل وحد باين انه تارجت ايه يبقا انت موصلتش للي هو عايزه.
ونفس الكلام بالنسبه للجايدلاينز الي بعتبرها اهم حاجه في الكلام الي انا قولته.
لان مينفعش الناس دي معروفه للجمهور بتاعها ان كل تصاميمهم لونها ازرق وبيكتبو بفونت معين.
تروح انت مستخدم احمر وكاتب بفونت تاني ، طبيعي شغلك هيترفض.
هتقولي طيب كل الكلام دا جميل بس دا لو انا بشتغل فري لانس طب لو بشتغل في شركه او Agency هروح انا اتكلم مع الكلاينت.
هقولك اكيد مش انت الي هتروح تتكلم مع الكلاينت وتساله عن البريف لان دا بيكون وظيفه الاكونت مانجر.
الي هو بيكون حلقه الوصل بينك وبين العميل وبيكون دوره انه يوفرلك البريف او المعلومات الي تفيدك في تصميم الاعلان او الكامبين.
فبالتالي لما حد يطلب منك شغل من غير بريف واضح وصريح تقدر تطلع منه شغل بالكواليتي المطلوبه متشتغلش فيه لان في الاغلب هيترفض.
او هتضيع وقت كبير جدا في تعديلات لغايه ماتوصل للمطلوب.
وعشان تطلب المعلومات دي بصوره احترافيه حاول تعمل لنفسك .Form
فيها كل الاسئله الي ممكن تيجي في بالك عشان توفر علي نفسك وتقدمها للشخص الي هتحتاج منه المعلومات دي
الاسئله المهمه بس متعملهوش ورقه امتحان فيزيا عشان ميزهقش منك.
ودا مثال على الـ Brief Templates طبعا هتغير فيها على حسب الـ business بتاع كل عميل هتشتغل معاه.
ودا كان موضوعنا عن معنى Brief البريف.
