تخصصات الجرافيك ديزاين كتير جدا، لو لسه بتبتدي في مجال الجرافيك ديزاين، فلازم تبقى عارف التخصصات دي ايه.
بالذات قبل ماتبتدي تدخل في مجال معين، عشان متضيعش وقت كتير انك تاخد قرار وتتعلم وبعدها ترجع لنقطه الصفر تاني.
حاول تاخد كام يوم في اشهر سوفت وير في كل مجال او تاخد نظره من بعيد للمجالات دي عشان تقدر تقر.
خلينا نبدأ بالتخصصات دي ونتكلم عليها واحده واحده بالمختصر المفيد.
١- الرسام illustrator :
في الاغلب الناس دي بتبقي درست فنون جميله وقادره انها تمسك ورقه وقلم وترسم، والحاجات الي من ضمن شغله بتكون زي الـ Storyboard للانميشن وساعات كمان بتكون للافلام المصوره.
اغلب شغلهم بيكون على برنامج الـ illustrator واغلب تعاملهم بيكون مع تيم الموشن ديزاين.
٢- الجرافيك ديزاينر (سوشيال ميديا):
والجرافيك ديزاينر هنا الفتره الاخيره بقى متخصص في اكتر من حاجه، هنا هنتكلم عن المتخصص في مجال السوشيال ميديا.
وهو فقط بيعرف يتعامل انه يشتغل على social media posts او social media campaign’s وعارف ازاي يخرج بوست يقدر بيه انه يجذب الشخص الي بيتفرج.
وفاهم مصطلحات السوشيال ميديا كويس ، انه يعرف يخرج content calendar المحتوي الشهري لحسابات السوشيال ميديا للعملاء.
او انه يخرج اعلانات ديجيتال زي google ads وعارف الفرق مابين المقاسات الي ممكن تطلب.
وبيكون عنده فكره عن الانميشن بحيث انه لو اتطلب منه gif يقدر ينفذها او بوست متحرك.
يعني باختصار الراجل دا شغله اكتر ديجيتال وبعيد عن فكره الطباعه.
والبرامج الي في الاغلب بيستخدمها بتكون photoshop – illustrator – aftereffects.
٣- الجرافيك ديزاينر (طباعه):
وهنا الراجل دا متخصص في موضوع الطباعه، عارف الالوان الي بيستخدمها والمقاسات لكل حاجه بتطلب منه.
يعني ممكن يشتغل علي مجالات او اعلانات طرق او برشور وهكدا.
وعارف ازاي يقفل شغله بحيث انه يكون جاهز انه يروح المطبعه للطباعه.
البرامج الي بيشتغل عليها اغلبهم photoshop – illustrator – indesign .
٤- مصمم التغليف او العبوات package designer :
وهو مجال ومصطلح الفتره الاخيره انتشر وبقي فيه شخص متخصص بس في تصميم العبوات والتغليف.
يعني لما تكون شركه البان مثلا عايزه تعمل عبوه او منتج جديد ، بتروح للشخص دا عشان يقدملها بس شكل جديد او تصميم للعبوه دي .
شغله بيكون علي برامج photoshop – illustrator – adobe demotions – 4pack.
٥- محرر الفيديو (video editor ) :
دا راجل متخصص في موضوع الفيديو او video montage بيكون عنده حس ابداعي في موضوع ترتيب الفيديو من حيث المشاهد وقصها وخلافه.
بيشتغل على adobe after effects – adobe premiere – final cut.
٦- المؤثرات البصرية للفيديو (VFX):
بيكون شغله انه يضيف المؤثرات البصرية علي الفيديوهات، مثال على كدا الخدع السينيمائية.
وبيكون برضو جزء من شغله تظبيط وتعديل الوان الفيديو ويخلي الفيديو متناسق مع الاصوات.
اكتر شغله بيكون على after effects – cinema 4d – black magic – apple motion.
٧- الموشن ديزاينر :
من التخصصات الممتعه، بيكون شغله اكتر مع الـ illustrator وبيكون مسؤول انه يشتغل على سبيل المثال افلام كارتون ثنائيه الابعاد 2D.
او فيديوهات متحركه زي الـ infographics او تصميم المقدمات intro.
مهم انه يكون دارس فن التحريك بالذات لو تحريك شخصيات كرتونيه.
اكتر شغله بيكون على adobe after effects – adobe premiere – adobe illustrator .
٨ – مصمم المواقع web designer :
بيكون تخصصه بس في تصميم المواقع الالكترونيه، بيكون فاهم UX وعارف يعني ايه يعمل موقع متناسق مع المستخدم الي بيوجه ليه الموقع دا.
بيكون عنده خلفيه بسيطه شويه عن البرمجه وايه ينفع المبرمج يعمله بعد التصميم الي بيسلمه ليه وايه مينفعش.
اغلب تعامله بيكون مع مبرمج المواقع.
شغله بيكون على photoshop – illustrator – dreamweaver – sketch .
وملحوظه : الفتره الاخيره ظهرت برامج كتير بتسهل علي مصمم المواقع جدا، لكن الي ذكرتها هي البرامج المتعارف عليها في تصميم المواقع منذ زمن.
٩- UX Designer :
والمختلف شويه عن مصمم المواقع انه بيكون قادر يصمم اي حاجه متعلقه بالديجيتال، بمعنى انه ممكن يصمم mobile application – web designer – interactive screens وغيرها.
بيكون دارس كويس جدا UX.
اغلب البرامج الي بيشتغل عليها photoshop – illustrator – adobe XD – sketch.
١٠ – مصمم ثلاثي الابعاد 3D designer :
واكيد هو متعارف هو بيعمل ايه ، لكن المجال دا بيكون متفرع لتخصصات كتير جداً.
يعني بيكون فيه شخص مصمم ثري دي متخصص بس في الـ modeling design يعني بيعمل بس المجسمات ثلاثيه الابعاد.
وبيكون فيه شخص متخصص بس في تحريك المجسمات دي .
وشخص اخر بيكون متخصص في الاضاءه.
وطبعا تخصصات اساسيه تانيه يعني مثلا هتلاقي واحد متخصص في تصميم الثري دي من ناحيه الديكور.
وواحد تالت في تصميم الثري دي من ناحيه افلام الكارتون.
وهكذا .
فيه برامج كتير جدا ومختلفه على حسب كل تخصص زي 3d Max – Maya – Blender – cinema 4d وغيرها.
في نهايه الموضوع فيه تخصصات اكيد ظهرت الفتره الاخيره اكتر من دي، لكن حاولت اجمع اكتر التخصصات المشهوره، او المطلوبه في سوق الجرافيك ديزاين
ودا كان موضوعنا عن تخصصات الجرافيك ديزاين.
تقدر تتابعني علي اليوتيوب من هنا.
لو عايز تعرف الفرق مابين الجرافيك ديزاينر والديجيتال ديزاينر ادخل هنا
