ابسط معنى للـ الستوري بورد هو التخطيط، وطبعاً دا اهم حاجه قبل ماتبتدي تعمل فيديو لحاجه معينه اياً كان نوعها تسويقي لشركه ، فيديو تعليم ، فيديو لمنتج معين عشان كدا لازم تعرف معنى Storyboard وطريقه تنفيذها.
معنى Storyboard
باختصار الـ storyboard هي عباره عن تصور الفيديو الي انت هتعمله للـ. client قبل تنفيذه.
اياً كان طريقه تنفيذك للفيديو هيكون متصور والا هيكون Animation.
شكل الـ Storyboard دي بيكون ازاي؟
ببساطه اكيد قريت في يوم مجله بطوط ؟ شوفت ترتيب المربعات الي بيكون فيها الاحداث؟.
نفس طريقه العرض مبتختلفش كتير مابينها وبين الـ Storyboard. و مهمتها الي بتخليك تتخيل الاحداث.
ايه فايدة الـ Storyboard؟
الـ Storyboard هي السيناريو او الخطه بالنسبالك، فايدتها هي اختصار الوقت من ناحيتك ومن ناحيه الـ Client.
بتريحك في الاتفاق مع الـ. Client على الفكره، وبتنجز وقتك بدل ما تعدل كتير على الفيديو وتاخد وقت ومجهود بالذات ان كلنا عارفين ان التعديل على الفيديو كارثه لو كان جهازك مبيستحملش.
بتعدل بس على الستوري بورد، ودا بيكون اسهل كتير، وبتكون الفكره اتضحت بنسبه كبيره لتصميم الفيديو او قصته للـ client ، ودا برضو بيريحك بدل ماتخلص الفيديو كله ويرجع يرفض قصته.
لازم اكون بعرف ارسم عشان اعرف اعمل Storyboard ؟
لا مش لازم، انك بتكون بتعرف ترسم اكيد الموضوع هيكون مريح واسهل بالنسبالك.
لكن دا مش شرط ، الفتره الاخيره شوفنا ستوري بورد كتير معموله Digital، ممكن بسهوله تجمع المشاهد الي انت عايز تعملها Vectors او صور تقريبيه للي انت هتنفذه.
يعني من الاخر مش هتغلب وليها اكتر من حل، وطريقه تنفيذ مش رسم بس.
هل الـ storyboard ضروريه اوي يعني ؟
هي خطوه زياده عن الفيديو الي انت هتعمله، بس مينفعش تتجاهلها للاسباب دي :
افضل طريقه لتوضيح فكرتك :
دايماً بندور علي اسهل وانسب الحلول الي نقدر نوصل بيها وجهه نظرنا وفكرتنا للـ client.
وبنواجه صعوبه في الموضوع دا لان اكيد انت شايف الموضوع بنظره الـ graphic designer وهو شايفه بنظره تانيه.
الستوري بورد انسب طريقه لتوضيح فكرتك وتوصيلها للـ client بسهوله من غير شرح كتير او انك تشرحله حاجه وهو يتخيل حاجه تانيه.
تنفيذ اسهل :
اياً كان نوع الفيديو الي انت هتعمله لو كان Animation او كان هيتصور.
في الحالتين الـ Storyboard هتسهل عليك كتير ، لو كان الفيديو هيتصور فاكيد الــ Storyboard هتفيد الفريق الي قايم على الفيديو كله من اول المخرج او المصور وغيره.
لو كان Animation ف اكيد هيكون بالنسبالك الموضوع اسهل انه مرتب اكتر وانك مش هتنسى مشهد من مشاهد الفيديو الي انت اتفقت مع الـ Clients عليها.
وقت اسرع :
زي ما قولنا فوق ان من فوايد انك تعمل الستوري بورد هي انجاز الوقت، مع الرغم انها ممكن تاخد منك وقت وانت بتجمع المشاهد.
لكن اكيد مش هيكون اكبر من الوقت الي انت تعدل فيه على فيديو او علي الـ Team الي هيصور ويعيد الشغل من جديد.
ازاي اعمل Storyboard ؟
بعد ماعرفنا معنى Storyboard – زي ماقولنا ان فيه طرقتين الاولى هي الرسم والتانيه هي انك تعملها على اي برنامج يريحك زي Photoshop او AI ، وشكلها بيكون كدا:
هتلاقي فيه Templates كتير جداً علي جوجل او مواقع تانيه عشان تسهل عليك.
لكن بقترح عليك انك تعملها انت بشكل مختلف يناسب الـ Brand بتاعك او الي انت شغال عليه.
هتحتاج تحت كل مشهد تكتب وصف المشهد الي هيحصل فيه ايه بالظبط، ولو فيه Voice over هتكتب الكلام الي هيتقال في المشهد دا معاه.
وكمان هتكتب حركه الكاميرا والزوايا ف كل مشهد او لو الفيديو بتاعك Animation هتكتب بس الـ Effects الي ممكن تكون في المشهد ايه مع شكل التنقل مابين مشهد والتاني.
البرامج الي ممكن تساعدك لعمل Storyboard:
طبعاً لو انت متمكن من الـ Photoshop او الـ.illustrator هيكون اسهلك انك تنفذ الـ Storyboard عليهم.
دي شويه برامج تانيه متخصصه لدا ممكن تنفذ عليها الستوري بورد بس للاسف مش ببلاش 😀
ودا كان موضوعنا عن معنى Storyboard وطريقه تنفيذها.
