8 حاجات هتخليك Freelancer ناجح
ناس كتير ضد فكره انها تشتغل في شركه ويكون ليها مدير وبتتخنق من التحكم. دي نوعية ناس فعلا موجودة وعقلية لازم نحترمها وليها اسبابها خلينا نقول ميزة انك تكون فري لانسر انك مستقل بنفسك وبشغلك.
وانك انت الي تحط مواعيدك وبتعمل سيستم لنفسك بدون تدخل اي شخص في طريقة شغلك.
لو انت من النوعية دي الكلام دا هيفيدك انك تكون فري لانسر ناجح، وهنقولك هنا 8 حاجات هتخليك Freelancer ناجح.
١– هتجيب او عميل ازاي في اسرع وقت
طبعا لو معندكش عملاء يبقى انت مش فري لانسر ، انت كدا هاوي ! طب ما ايه الفرق ؟
الفرق ان الفري لانسر تعتبر انت شركه نفسك. ان يكون عندك عميل عرفت انك تقنعه انك يكمل معاك بشكل متواصل وبمعنى اصح ماسكله كل شغله وكل مايحتاج حاجه يجيلك.
ودا بيكون بناء على حاجات كتير بتقدر انت تحددها منها انك تنزل سعرك الى حداً ما شويه او كواليتي شغلك مميزه عن غيرك او بتقدم خدمه غيرك مش بيقدمها.
طب والهاوي ؟ الهاوي هو الي بيعمل شغل للعميل وبعدها بيقفل تليفونه لو احتاج شغل تاني عشان هو ملوش مزاج يشتغل النهارده او فيه فيلم عايز يتفرج عليه.
او هتتاخر في تسليم ميعاد انت وعدت بيه العميل بالتالي مش هتعرف تكسب العميل او مش هتقدر يكون ليك سمعه كويسه تقدر تجيب بيها شغل اكتر !.
خليك فاكر ان مش معنى انك فري لانسر ف تتجاهل الحرفية في التعامل.
بالعكس دا الي هيثبت ويقعنه انه يتعامل معاك افضل من انه يتعامل مع شركه.
فيه مواقع كتير جداً تقدر تساعدك انك تلاقي عميل ليك وبطرق مختلفة فيه منها قصيرة المدى وبعيدة المدى.
زي ايه؟.
الطريقة التانيه الي ناس كتير بتتجاهلها هي العلاقات.
ودا اسلوب دايماً ناجح في بدايه اي شركه صغيره او اي شخص بادئ في مجال الفري لانس انك تستغل علاقتك. اكيد حد من صحابك عنده شركه اكيد حد من قرايبك عنده ستور.
هتلاقي دايما ٧٠٪ من نقطه انطلاقك من الطريق دا.
٢- هتقدم نفسك للعملا وللسوق باسم ايه ؟.
هنا عندك اختيارين. انك تختار انك تقدم نفسك للناس باسمك انت وتبتدي تعمل براندينج لنفسك علي الاساس دا ؟. ولا هتبتكر اسم تسوق بيه لنفسك.
وانا ارجحلك الاختيار دا اكتر لانه علي المدى البعيد هيكون مفيد اكتر لو ناوي توسع وتعمل لنفسك بيزنس اكبر من انك تكون فري لانسر ولا هتبتكر اسم تسوق بيه لنفسك.
وانا ارجحلك الاختيار دا اكتر لانه علي المدى البعيد هيكون مفيد اكتر لو ناوي توسع وتعمل لنفسك بيزنس اكبر من انك تكون فري لانسر.
٣- البورتفوليو
للاسف عدد كبير جدا من المصممين بيكون عايز يشتغل فري لانسر ومتلاقيش عامل لنفسه بورتفوليو او حاجه يقدر يسوق بيها لنفسه. لازم تكون فاهم ان دي من اهم الحاجات الي هتكون بتجبلك شغل بشكل دوري.
اكنك بتستثمر او بمعنى اصح اكن دا المحل ودي الفاترينه بتاعتك الي هتقدر تجذب بيها الناس انها تدخل تشتري او تطلب خدمه منك.
٤– قدم لاول عميل ليك اكتر ماهو محتاج
اكبر غلطه انك تكون بخيل في الي بتقدمه للعميل بتاعك بالذات اول كام عميل ليك.
خليك عارف ان معظم الفري لانسر بالنسبه للعملاء هما غير وافيين بمواعيدهم او بالوعود الي بيقدموها.
فرصتك هتكون كويسه جداً انك في اول تعامل مع كل عميل تقدمله اكتر ماهو متوقع.
ودا بيزيد فرصتك انه يطلب منك مره واتنين واكتر طول مانت بتفاجئه بالي انت بتقدمه.
٥– بلاش تناكه في الاول
وحبيت اكتبها بالطريقه دي ، لان للاسف فيه ناس كتير بتنصح انك فري لانسر فانت هتختار العميل الي علي مزاجك !.
اه كلام جميل وصح بس الكلام دا لو انت بقالك فري لانسر خبره اربع خمس سنين واسمك اتعرف جدا وساعتها فعلا لو شايف ان فيه عميل هيكون مش مناسب بالنسبالك التعامل معاه.
نفس الكلام في اسعارك. مش معنى كدا اني بقولك ارمي سعر في الارض.
بس في نفس الوقت ميجيش اول عميل يطلب منك حاجه تدهاله بضعف السعر.
وخليك فاكر ان دايماً العميل زي ما بيختار الكواليتي الكويسه بيختار السعر المعقول ودي هتزيد فرصتك انه يختارك انت.
٦– دايما دور علي عملاء جدد
اكتر حاجه ممكن تسمعها من فري لانسر ايه ؟. ان الفري لانس مش مضمون وتشتغل شهر وشهر لا ؟ مظبوط.
بس خليني اقولك اسبابها ايه. معظم المقتنعين بالجمله دي هما نفس الناس الي قاعدين مستنين الشغل يجيليهم لغايه عندهم من غير مايدورو هما علي عملا جدد، طيب اعمل دا ازاي انزل الشارع ادور يعني ؟.
اكيد لا.
بس لازم تعتبر ان الفري لانس عباره عن شركه متشكله في هيئه شخص واحد. والشركه بيكون فيها اقسام اكيد ومن ضمنهم فريق التسويق.
لازم تفرغ نفسك او تحدد يوم في الاسبوع يكون هو دا اليوم الي بتعمل فيه خطه تسويق لنفسك.
ايا كانت هي طريقتها ايه من الحاجات الي اتكلمنا فيها فوق.
ودا دايما هيخلي اول باول فيه عملا جديدة بتجيلك قبل ماتخلص شغل العميل الي قبله وهكذا.
٧- متتكسفش في طلب فلوسك
ناس كتير من النوع دا للاسف انهم بيتكسفو يطلبو حقهم !
خلي دايما في بالك ان زي ما العميل بيطلب منك شغل تسلمه في وقت معين انت كمان لازم تطلب منه فلوسك في الوقت المحدد.
مش كدا بس انت ممكن بعد ماتعمل ليك اسم وبنيت نفسك في مجال الفري لانس سهل انك تحط عقوبات او جزء من المبلغ زياده عن المتفق عليه لو العميل اتاخر عن الدفع.
في نفس الوقت انت ممكن تعمل العكس، ممكن تحط خصم بسيط عن المبلغ الي اتفقت عليه لو العميل دفع بدري عن الميعاد المتفق عليه.
٨– استغل كل فرصه قدامك
متخليش علاقتك بالعميل انه يطلب منك الشغل وتسلمه وتخلص علاقتك بيه علي كدا !.
شوف هو ممكن يحتاج ايه تاني تقدر انت تعمله ، عملتله كام بوست سوشيال ميديا ؟.
مش ممكن يكون عايز فيديو تقدر انت تعمله ؟ ممكن برضو يكون عايز برشور ؟.
قدمله خدماتك واعرض عليه حاجات تتوقع انه يكون محتاجها دايما سؤوالك هيخليه يفكر انه لو فعلا عمل الحاجه دي هتفيده ازاي ؟.
حاول قبل ماتبدأ او تاخد قرارك انك تكون فري لانسر تكون متوفره فيك الصفات او تقدر تطبق كل الكلام الي قولناه علي قد ماتقدر.
لكن نصيحتي ليك ، متجازفش – متسيبش شغلك المضمون عشان خاطر الفري لانس ..
ابتدي في الفري لانس بجانب شغلك ولو شوفت ان فعلا التجربه مربحه اكتر من مرتبك بكتير ابتدي فكر انك تكمل فيه هو بس.
ودول كانو الـ 8 حاجات هتخليك Freelancer ناجح
